Акимат » Кәсіптік оқыту

Кәсіптік оқыту

Қазақстан Республикасы Үкіметінің 2016 жылғы 29 желтоқсандағы 919 нөмірлі Қаулысымен бекітілген Нәтижелі жұмыспен қамту және кәсіпкерлікті дамыту туралы Бағдарламасының бірінші бағыты бойынша жұмыспен қамту Орталықтары арқылы қысқа мерзімді кәсіптік оқулар ұйымдастырылады.
Қысқа мерзімді кәсіптік оқудан өтетін Бағдарламаға қатысушылар 29 жасқа дейінгі жастағы жастар мен халықты жұмыспен қамту орталықтарында тіркелуіне қарамастан жұмыссыздар және өзін-өзі жұмыспен қамтығандар Бағдарламаға қатысуға өтінішпен халықты жұмыспен қамту орталықтарына, білім беру ұйымдарына, ауылдық округ немесе елді мекен әкіміне жүгінеді және тізбесін білім беру саласындағы уәкілетті орган бекітетін Техникалық және кәсіптік білімі бар кадрларды даярлауды және қысқа мерзімді кәсіптік оқуды ұйымдастыру қағидаларында көзделген құжаттарды: жеке бас куәлігін, еңбек кітапшасын (болған жағдайда), білімі туралы құжатын ұсынады. 
Білім беру ұйымдары, ауылдық округтер немесе елді мекендердің әкімдері үш жұмыс күні ішінде үміткерлерден келіп түскен құжаттар мен өтініштерді халықты жұмыспен қамту орталықтарына береді;  халықты жұмыспен қамту орталықтары екі жұмыс күні ішінде үміткерлердің құжаттарын Бағдарламаға қатысушыларға қойылатын талаптарға сәйкестігін тексереді, үміткерлердің тізімдерін қалыптастырады және қалалық комиссияға жібереді; қалалық комиссия үміткерлердің тізімдерін үш жұмыс күні ішінде қарап, бекітеді;  халықты жұмыспен қамту орталықтары үш жұмыс күні ішінде үміткерлерді аудандық (қалалық) комиссия қабылдаған шешім туралы хабардар етеді және оларға білім беру ұйымдарына жолдама береді.
Облыстық бағдарламаларды үйлестіру Басқармасы бекіткен жоспар аясындағы бірінші транш бойынша  Семей қаласында 450 адам (соның ішінде 100 адам – арнайы жобалар бойынша)  қысқа мерзімді курстарға оқытылуы қажет. Екінші транш бойынша тағы да 972 адам оқытылады деп жоспарланған. Қала бойынша барлығы  1422 адам қысқа мерзімді курстарда оқытылады деп күтілуде.  Қазіргі уақытта «Семей қаласы әкімдігінің халықты жұмыспен қамту орталығы» мамандары белгіленген жоспарды орындау мақсатында  мамандықтар бойыша топтарды іріктеу жұмыстарын жүргізуде. Оқуларға жолдама беру ведомствоаралық өңірлік комиссияда оқу орындарының тізімі мен мамандықтар бағасы  бекітілгеннен кейін жүзеге асырылады.
Аталған Бағдарламаны жүзеге асыру мақсатында Қазақстан Республикасы Еңбек  және әлеуметтік қамту Министрлігі әзірлеген 8 арнайы жобаның 5-і бойынша Семей қаласында 100 адам қысқа мерзімді кәсіптік оқулардан өтеді:
№ 2-ші «Кәсіби няня» жобасы. Жобаның мақсаты – әйелдердің жұмыспен қамтылуын қамтамасыз ету. Жобаны жүзеге асыру арқылы 20-дан 45-ке дейінгі әйелдерді 3 жасқа дейінгі, сондай-ақ, мүмкіндігі шектеулі балаларды күтудің жолдарын үйрету.  Семей қаласы бойынша 20 адамды оқытуға 3706,0 мың теңгеге қажеттілік туралы есеп облыстық бағдарламаларды үйлестіру Басқармасына ұсынылды. Қазіргі уақытта жұмыспен қамту орталығының мамандары бұл адамдардың курсты аяқтағаннан кейін қалада ашылады деп күтілудегі 5 балалар бақшасына жұмысқа орналастыру бойынша жұмыстар жүргізуде.
№ 3-ші «Кеңесші» жобасы. Жобаның мақсаты -  зейнеткерлер мен зейнет алды жасындағы адамдардың жұмыспен қамтылуын қамтамасыз ету. Зейнеткерлер мен зейнет алды жасындағы адамдарды қиын жағдайға душар болған азаматтарға кеңес беруге оқыту арқылы жоба жүзеге асырылады. Семей қаласы бойынша 10 адамды оқытуға 1235,0 мың теңгеге қажеттілік туралы есеп облыстық бағдарламаларды үйлестіру Басқармасына ұсынылды. Оқуды аяқтағаннан кейін кеңесшілер қаладағы дәрігерлік-әлеуметтік мекемелерге жұмысқа орналастырылады немесе сол мекемелерге ақылы қоғамдық жұмыстарға жіберіледі.
№ 4-ші «Мамандық» жобасы. Жобаның мақсаты - жұмыссыз жастарды, өзін-өзі жұмыспен қамтығандарды және жұмыссыз азаматтарды қызмет көрсету саласының мамандықтарына оқыту. Семей қаласы бойынша 30 адамды оқытуға 4453,0 мың теңгеге қажеттілік туралы есеп облыстық бағдарламаларды үйлестіру Басқармасына ұсынылды. Бұл жоба бойынша шаштараз, қауіпсіздендіру агенті, қызмет көрсету менеджері мамандықтарына қысқа мерзімді курстарға оқыту жоспарланған. Жұмыспен қамту орталығының мамандары осы мамандықтар бойынша жұмыс берушілерден тапсырыстар жинастыруда.
№ 5-ші «Бос жұмыс орындары» жобасы. Жобаның мақсаты – жұмыс берушілердің білікті мамандарға деген сұранысын қанағаттандыру. Жастарды, жұмыссыздар мен өзін-өзі жұмыспен қамтығандарды жұмыс берушілердің сұранысына қарай мамандықтарға оқыту. 
Қала бойынша 10 адамды оқытуға 1853,0 мың теңгеге «Семей ет комбинаты» ЖШС-нің тапсырысы бойынша «Ет сылушы» мамандығына оқыту   қажеттілігі туралы есеп облыстық бағдарламаларды үйлестіру Басқармасына ұсынылды. 
№ 6-шы «Кәсіпкер» жобасы. Жобаның мақсаты – жаппай кәсіпкерлікті дамыту, өзін-өзі жұмыспен қамтығандар мен жұмыссыз азаматтарды өз істерін ашу үшін кәсіпкерлік негіздеріне үйрету. Жобаға кәсіпкерлер және кредиттік берешегі бар жаңадан бастаған кәсіпкерлер қатыса алмайды. Кәсіпкерлік негіздеріне оқыту колледждерде 2 айдан 6 айға дейін, өңірлік кәсіпкерлер Палатасындағы кәсіпкерлер орталықтары арқылы 1 айға дейін оқытылады. Кредит алудың алдында бағдарламаға қатысушылар салық органдарында міндетті түрде тіркеуден өтеді. Облыстық бағдарламаларды үйлестіру Басқармасына 30 адамды оқытуға 3864,0 мың теңгеге  есеп ұсынылды. Жобаға қатысушыларға сертификат алғаннан кейін өз ісін ашу үшін кредит алуға жәрдем көрсетіледі.
 
 

Жұмыспен қамту және әлеуметтік бағдарламалар бөлімі


Кәсіптік оқыту 2016 жыл

 

Өңдеу күні: 17-04-2017